बजारमा खाना पकाउने ग्यासको अभाव भएसँगै खाना पकाउनका लागि विकल्पका रुपमा रहेको विद्युतीय चुलो (इन्डक्सन चुलो) को माग अत्यधिक बढेको व्यापारीले बताएका छन् ।
विगतका वर्षमा दैनिक एक÷दुईवटा मात्र बिक्री हुँदै आएकामा अहिले ग्यासको अभाव भएसँगै दैनिक २० देखि २५ वटासम्म इन्डक्सन चुलोको बिक्री हुने गरेको कलङ्कीमा सात वर्षदेखि भाडा पसल गर्दै आउनुभएको विष्णु श्रेष्ठले बताउनुभयो ।
श्रेष्ठका अनुसार चुलोको माग बढेसँगै गत वर्षको तुलनामा मूल्य पनि धेरेले नै बढेको छ । गत वर्षमा एउटा चुलोको मूल्य रु तीनदेखि चार हजारसम्म मात्र रहेको थियो भने यस वर्ष ग्यासको अभावका कारण यसको माग बढेकाले चुलोको क्षमताअनुसार रु छ देखि ११ हजारसम्ममा किनबेच भइरहेको सोही स्थानका अर्का व्यापारी सोमनाथ अर्यालले बताउनुभयो ।
बत्ती भएको समयमा यस चुलोमा खानाको विभिन्न परिकार पकाउन छिटो र सजिलै गर्न सकिने भएकाले यस चुलोप्रति मानिसको आकर्षण बढेको हो । डेढ महिनादेखि भारतले गरेको अघोषित नाकाबन्दीका कारण नेपालमा अहिले इन्धन र ग्यासको निकै समस्या भएको छ ।
यस्तै समस्याले गर्दा बजारका भान्सामा प्रयोग हुने विद्युतीय सामानको माग बढेको हो । ग्यास अभावले गर्दा अहिले बजारमा इन्डक्सन चुलोको मात्र नभई खाना पकाउने राइस कुकर, पानी तताउने विद्युतीय कित्ली, हिटरलगायत सामानको पनि मूल्य बढेको छ ।
यो खबर पढेर तपाईलाई कस्तो महसुस भयो ?
Related Posts
