२०७३ को नयाँ वर्षको शुभदिनमा फुटुङ र टोखा जोड्ने संगम पुलको उद्घाटन र सञ्चालन

• सावित्री बस्नेत,/साङ्ले खोला ,काठमाडौं

नयाँ वर्षको शुभदिनको बिहानीमा एक सामाजिक कामको शुरु भएको छ । जनताको आधारभुत आवश्यकता र देश विकासको आधार विकास निर्माण नै हो । विकास निर्माणका लागि सामाजिक उत्तरदायित्व पनि उत्तिकै आवश्यकता छ भने राजनीतिक प्रतिबद्धता पनि चाहिन्छ । यति मात्र भएर मात्र पुग्दैन, स्थानीयबासिन्दाको सहयोग र साथ पनि विकास निर्माणको दिगो आधार हो । यी सबै कुराको मेल बन्यो टोखा गंगबु, साङ्ले खोला जोड्ने संगम पुल । टोखा गंगबु, साङ्ले खोला पुल निर्माण उपभोक्ता समितिको अगुवाईमा संगम पुलको निर्माण २०७२ को अन्तिम दिनसम्म सम्पन्न भएको हो । काठमाडौं क्षेत्र नं ६ का सभासद भीमसेनदास प्रधानको राजनीतिक पहलमा सभासदको कोषको १० लाख सहयोग नै संगम पुल निर्माणका लागि विशेष आधार बनेको टोखा गंगबु, साङ्ले खोला पुल निर्माण उपभोक्ता समितिले जनाएको छ । तारकेश्वर नगरपालिकाको सहयोग पनि उक्त पुल निर्माणको लागि जुटेको थियो ।

राजधानीको नजिक भएर पनि धेरै समय पछि स्थानीय समुदायको एकता सभासद् भीमसेनदासको राजनीतिक पहलमा संगम पुल निर्माण सम्पन्न बनेको हो । पुल निर्माणका लागि नपाली कँग्रेसको विशेष पहल रहेकोले यसको सबैले प्रशंसा गरेका थिए । विकास निर्माणका लागि पहल जुनसुकै राजनीतिक दलले गरे पनि सामूहिक एकता सबै पार्टीको रहनुपर्ने र त्यसको लागि उपभोक्ता समितिको ध्यान जानुपर्ने पुल उद्घाटनको क्रममा सभासद भीमसेनदास प्रधानले बताए । नेपाल भुकम्प जोखिम क्षेत्र रहेकोले विकास निर्माणका लागि दिगो संरक्षणको नीति कडाईका साथ उपभोक्ता समिति र स्थानीयबासीको अनुगमन गर्नुपर्नेमा पनि भीमसेनदासले सबैको ध्यानाकर्षण गराए । संगम पुल उद्घाटनका क्रममा जिल्ला विकास समिति काठमाडौंका बरिष्ठ इन्जिनियर, तारकेश्वर नगरपालिकका कार्यकारी अधिकृत, मनमैजु, टोखा, गंगबुका स्थानीय निकायका प्रतिनिधि, टोखा गंगबु, साङ्ले खोला पुल निर्माण उपभोक्ता समितिका पदाधिकारीहरु र जनसमुदायको उपस्थिती रहेको थियो । कुल ८२ लाख लागतमा निर्माण सम्पन्न संगम पुल निर्माणमा ६० प्रतिशत जनसहभागीता र ४० प्रतिशत सरकारी तहबाट सहयोग प्राप्त रहेको टोखा गंगबु, साङ्ले खोला पुल निर्माण उपभोक्ता समितिले जनाएको छ ।

२०७३ सालको शुभ बिहानीसँगै शुभकामना आदानप्रदान गर्दै क्षेत्र नं ६ नेपाली कँग्रेसका सभासद् भीमसेनदासले पूजाआजा सहित संगम पुलको उद्घाटन गरे । पुल उद्घाटनसँगै सार्वजनिक रुपमा आवजावतका लागि प्रधानसहित सरोकारवाला निकायका प्रतिनिधिहरु, उपभोक्ता समितिका पदाधिकारीहरु र स्थानीय बासिन्दाहरुले हिडेर पुल पार गरेका थिए । जेहोस् विकास निर्माणका लागि राजनीतिक पहलसँगै स्थानीयबासीको एकताको शुभ खबर संगम पुल सञ्चालनबाट २०७३ ले आम नेपालीका लागि शुभ संकेत दिएको छ । यस्तै सामाजिक एवं सार्वजनिक काममा राजनीतिक ध्यान जान सकोस् हामी सबैको शुभेच्छासहित नववर्ष २०७३ को शुभकामना छ ।

फुटुङ र टोखा जोड्ने संगम पुलको उद्घाटनको फोटो झलकहरु