६ महिनामा कुन कुन बाणिज्य बैंकहरुले कति नाफा कमाए ?

Feb Tue 2020 05:40:49

295 views

६ महिनामा कुन कुन बाणिज्य बैंकहरुले कति नाफा कमाए ?

-सुदिल पोखरेल

भारतको अघोषित नाकाबन्दीको समयमा पनि बैंकहरुले आफ्नो नाफामा भने बृद्धि गरेको देखिएको छ। चालु आर्थिक वर्ष २०७२/०७३ को छ महिनामा देशमा रहेका बाणिज्य बैंकहरुले १४ अर्ब ८३ करोड ६४ लाख ७९ हजार रुपैयाँ मुनाफा कमाएका छन्।

जोखिमको समयमा पनि बैंकहरुले आफ्नो मुनाफामा बृद्धि गरेको देखिएको छ। बैंकहरुले हालै सार्वजनिक गरेको ६ महिनाको अपरिस्कृत वित्तीय बिबरणमा भूकम्प र नाकाबन्दीको असर देखिएको छैन।

हिमालय बैंकका सिइओ अशोक शमशेर जबरा नेपालका बैंकहरु जोखिमको समयमा पनि मुनाफा कमाउन अभ्यस्त हुँदै आएकोले हालसम्म बैंकहरुको मुनाफामा नाकाबन्दीको असर नदेखिएको बताउँछन्।

उनले भने ‘१२ वर्षे माओवादीको द्वन्दकाल, आन्दोलन लगायतका कैयन जोखिम नेपालका बैंकहरुले भोगिसकेका छन्, त्यसैले यस्ता जोखिमको अनुभवकै कारण नाकाबन्दीको समयमा पनि सहि तवरले व्यवस्थापन गरेका कारण चालु आर्थिक वर्षको छ महिनामा बैंकहरुको मुनाफामा बृद्धि हुन गएको हो।’

उनका अनुसार नाकाबन्दीको समयमा पनि बैंकहरुमा सबैजसो ऋणीहरुले नियमित ब्याज बुझाइरहेका छन्। अधिकांश ऋणीहरुले ब्याज समयमा बुझाइरहेकोले पनि मुनाफामा असर नदेखिएको उनको भनाई छ।

नाकाबन्दीका कारण देशमा आर्थिक क्रियाकलापमा बाधा पुग्दा पनि देशका ४ वटा बाणिज्य बैंकले भने छ महिनामै अर्ब कमाएका छन्। बैंकहरुले हालै प्रकाशित गरेको वित्तीय बिबरण अनुसार चालु आर्थिक वर्षको छ महिनामा नबिल बैंक, नेपाल इन्भेष्टमेन्ट बैंक, नेपाल बैंक र राष्ट्रिय वाणिज्य बैंकले एक अर्ब भन्दा माथि मुनाफा कमाएका छन्। सबैभन्दा बढि नबिल बैंकले कमाएको भएपनि गत आर्थिक वर्षको तुलनामा नेपाल बैंकले यसवर्ष मुनाफामा सबैभन्दा धेरै बृद्धि गरेको छ।

गत आर्थिक वर्षको पुस मसान्तसम्ममा १ अर्ब ११ करोड १२ लाख ६६ हजार खुद मु्नाफा कमाएको नबिल बैंकले चालु आर्थिक वर्षको सोही अवधिमा १ अर्ब ३५ करोड १२ लाख ७९ हजार खुद मुनाफा कमाएको छ।

नेपाल बैंकले गत आर्थिक वर्षको छ महिनामा ३८ करोड ७४ लाख ६१ हजार रुपैयाँ खुद मुनाफा कमाएको थियो। तर चालु आर्थिक वर्षको छ महिनामा खुद मुनाफामा १ सय ७० प्रतिशत बृद्धि गर्दै १ अर्ब ४ करोड ८१ लाख ९ हजार खुद मुनाफा कमाएको देखिएको छ।

त्यस्तै चालु आर्थिक वर्ष २०७२/०७३ को पुस मसान्तसम्ममा ६ वटा बाणिज्य बैंकको मुनाफामा भने गिरावट आएको देखिएको छ।

गत आर्थिक वर्ष २०७१/०७२ को पुस मसान्तसम्मको तुलनामा चालु आर्थिक वर्ष २०७२/०७३ को सोहि अवधिमा राष्ट्रिय बाणिज्य बैंक, एभरेष्ट बैंक, स्टायण्डर्ड चार्टड बैंक, प्रभु बैंक, कृषि बिकास बैैंक र सिभिल बैंकको नाफामा गिरावट आएको देखिएको छ।

राष्ट्रिय बाणिज्य बैंकको खुद मुनाफामा सबैभन्दा बढि गिरावट आएको देखिए पनि अर्ब कमाउने बैंकहरुको सुुचीमा रहेको छ। राष्ट्रिय बाणिज्य बैंकले चालु आर्थिक वर्षको छ महिनामा १ अर्ब ७ करोड १९ लाख ६१ हजार रुपैयाँ कमाएको छ। तर बैंकको मुनाफा गत वर्षको पुस मसान्तको तुलनामा चालु आर्थिक वर्षको सोही अवधिमा ७० दशमलव २२ प्रतिशतले गिरावट आएको देखिएको छ।

कुन कुन बैंकले कति मुनाफा कमाए ?

बैंक	गत आवको पुस मसान्तसम्म	चालु आवको पुस मसान्तसम्म
नबिल बैंक	1,111,265000	1,351,279,000
नेपाल इन्भेष्टमेन्ट बैंक	966,074000	1,078,185,000
राष्ट्रिय बाणिज्य बैंक	3,600,773000	1,071,961,000
नेपाल बैंक	387,461000	1,048,189,000
हिमालयन बैंक	589,500,000	802,218 ,000
ग्लोबल आइएमई बैंक	540,458.000	762,715 ,000
एभरेष्ट बैंक	771,226,000	753,775,000
एसबिआई	532,780,000	623,928 ,000
स्टायण्डर्ड चार्टड	644,686,000	612,009,000
एनआइसि एसिया	360,615,000	502,061 ,000
सिद्धार्थ बैंक	326,086,000	487,412 ,000
प्राइम बैंक	362,103,000	469,222 ,000
एनएमबि बैंक	270,579,000	421,211,000
सिटिजन बैंक	279,872,000	418,482 ,000
सानिमा बैंक	278,175 ,000	408,027,000
प्रभु बैंक	540,211,000	405,644,000
माछापुच्छ्रे बैंक	344,087,000	401,377,000
कृषि बिकास बैंक	534,534,000	387,529 ,000
एनबि बैंक	331,125,000	368,573 ,000
सनराईज बैंक	260,451,000	363,954 ,000
बैंक अफ काठमाण्डु	330,762,000	329,194 ,000
लक्ष्मी बैंक	177,183,000	303,254 ,000
एनसिसि बैंक	239,237,000	246,881 ,000
मेगा बैंक	158,334,000	223,509 ,000
कुमारी बैंक	181,676,000	210,194 ,000
लुम्बीनी बैंक	170,039,000	181,432 ,000
सेञ्चुरी बैंक	99,818,000	160,764 ,000
सिभिल बैंक	176,973,000	156,339 ,000
ग्रान्ड बैंक	(138,684,000)	149,136 ,000
जनता बैंक	109,199,000	138,025 ,000
जम्मा	13,425,333,000	14,836,479,000