नेपाली एकांकी नाटकको प्रबर्द्धनमा निरन्तर सक्रिय ललितपुर मा वि

• सन्तोष गौतम

ललितपुरको लगनखेल स्थित ललितपुर माध्यामिक विद्यालयले २०३८ सालदेखि अनवरत रुपमा यस क्षेत्रको शैक्षिक विकासमा योगदान दिदैं आइरहेको छ । समय सापेक्ष, गुणस्तरीय शिक्षाको लागि चिरपरिचत यस ‘क’ श्रेणीको गुठीका अन्य केही उत्कट विशेषताहरु रहेको पाइएको छ । जसलाई प्रकाश पार्दै विद्यालयको निर्देशक के. वि. तुलाधर भन्नुहुन्छ , “हाम्रा विद्यार्थीहरु प्रत्येक वर्ष उत्कृष्ट अंकका साथ उत्तिर्ण भैरहेका छन् । अझ हाम्रो जोड स्वावलम्वी नागरिक तयार गर्नेमा छ , त्यसको लागि उनीहरुमा लुकेर रहेको प्रतिभाको पहिचान गर्न सहयोग पु–याइ दृढ आत्मविश्वासका साथ अघि बढ्न सक्ने बनाउने कुरामा हाम्रो अथक प्रयास जारी छ र रहने छ ।” यस विद्यालयमा अन्य विभिन्न अतिरिक्त क्रियाकलापको अलावा वार्षिक रुपमा १६ वटा एकांकी नाटकहरु मञ्चन गरिन्छन् जसमध्ये ८ वटा नेपाली एकांकी हुन्छन् । यसै सन्दर्भमा विद्यालयका प्रधानअध्यापक माधव सिटौलाले भन्नुभयो , “शिक्षण संस्कृति सापेक्ष हुनु जरुरी छ । शिक्षणले सिकाई क्रियाकलापहरुले हाम्रो दूर्लभ अपनत्वलाई जोगाउन सक्नु पर्दछ । एकांकी नाटक प्रतियोगिताले विद्यार्थीहरुलाई हाम्रा सामाजिक मूल्यमान्यताहरुलाई बुझ्न र आत्मसाथ गर्न सघाउ पु–याउनुका साथै विविधतामा एकता प्रवद्र्धन गर्नमा मदत पु–याएका छन् ।” विद्यालयका सह निर्देशक डा. उत्तमराज त्रिपाठीका अनुसार यस वर्ष नेपाली तर्फ मरुभूमिका लेखक , अभिनन्दन , बहुला काजीको सपना , नाता , हामी जुट्नु पर्छ ।, आमाको माया, आमाबाब दायित्व, र यस्तै छ यहाँ जस्ता नाटकहरु मञ्चन गरिएका थिए । यी कार्यक्रमरुमा विद्यार्थीको हौसलाको लागि नेपाली शिक्षा, साहित्य र रंगमञ्चका लब्ध प्रतिष्ठित व्यक्तित्वहरुलाई प्रमुख अतिथि तथा अतिथिको रुपमा निमन्त्रणा गरिनुका साथै मूल्याङ्कनका लागि विभिन्न विशेषज्ञहरु निर्णायक मण्डल अभिभावकहरु तथा समाजका अन्य नाटकप्रेमी महानुभावहरुलाई समेत आमन्त्रण गरिन्छ । पश्चिमी संस्कृतीको प्रभाव दिनानुदिन बढिरहेको वर्तमान सन्दर्भमा यस्ता कदमहरुले हाम्रो नाट्यक्षेत्रलाई जिवन्त राख्दै संस्कृतिको प्रवद्र्धनमा योगदान पु–याउने विश्वास गर्न सकिन्छ ।