कता हरायो यत्रो इन्धन ?

भारतले अघोषित नाकाबन्दी लगाएयता पूर्वी नाका जोगबनीबाट मात्र १ सय ४५ ट्यांकर पेट्रोल, ४ सय ७७ ट्यांकर डिजेल र १ सय ४२ बुलेट ग्यास नेपाल भित्रिएको छ । जसमध्ये १ सय ८ ट्यांकर पेट्रोल, ३ सय ५७ ट्यांकर डिजेल र १ सय ६ वटा ग्यास बुलेट काठमाडौं पठाइएको छ ।

दसचक्के एउटै ट्यांकरमा २० हजार र ६ चक्केमा १२ हजार लिटर पेट्रोलियम पदार्थ अट्दछ । जोगबनी नाकाबाट भित्रिएको पेट्रोलियम पदार्थ काठमाडौं पठाउन दसचक्के ट्यांकरकै प्रयोग भइरहेको स्रोतको भनाइ छ । काठमाडौं पुर्याइएका १ सय ८ ट्यांकरमा २१ लाख ६० हजार लिटर पेट्रोल थियो ।

५ लिटरकै दरले वितरण गर्ने हो भने जोगबनी नाकाबाट मात्रै काठमाडौं पुगेको पेट्रोल ४ लाख ३२ हजार सवारीसाधनले पाउँछ । असोज १८ देखि कात्तिक २९ गतेसम्म जोगबनी नाकाबाट विराटनगर डिपो आइपुगेको पेट्रोलियम पदार्थमध्ये ७५ प्रतिशत गृहमन्त्रालयको निर्देशनमा काठमाडौं पठाइएको छ ।काठमाडौंवासी भने पेट्रोलियम पदार्थको चरम अभाव झेल्दै छन् ।  नागरिक दैनिकमा खबर छ ।

काठमाडौं । भारतले नाकाबन्दी गरेको मौका छोप्दै नेपाल आयल निगमकै उच्च अधिकारी र व्यापारीले साँठगाँठमा पेट्रोलियम कालोबजारी गरिरहेको खुलेको छ ।

आजको नागरिक दैनिकमा खबर छ–पाँच दिनयता राजधानी भित्रिएको पेट्रोल र डिजेलको परिमाणबाट मात्र कालोबजारियाले झन्डै आधा अर्ब रुपैयाँ कमाएको र यो रकम निगमका उच्च अधिकारी, डिपो प्रमुखदेखि राजनीतिक नेतृत्वसम्म भागबन्डा गरिएको स्रोतले दाबी गरेको छ ।

‘निगमले तेल वितरण पारदर्शी नगर्दा सरकारकै संरक्षणमा तेलको कालोबजारी भइरहेको छ’ एक उद्योगीले भने । निगमले इन्धनको चरम संकट देखाउँदै गर्दा कात्तिक २६ गतेदेखि ३० गतेसम्म भारतबाट इन्धन बोकेका ३ सय ट्यांकर काठमार्डौं भित्रिएको थियो । त्यसबाट ६० लाख लिटर तेल आएको थियो । यति परिमाणको तेल सामान्य अवस्थामा नियमसँगत बाँडेको भए कुल मागको ६० प्रतिशत पूरा हुन्थ्यो । निगमले आफ्नै संलग्नतामा संस्थागत रुपमै कालोबजारी गरी प्रतिट्याकंर औसत १५ लाख रुपैयाँसम्म कुम्ल्याइरहेको तथ्य खुलेको छ । सम्बद्ध व्यवसायीका अनुसार सामान्य दिनमा २० हजार लिटरको एक ट्याकर पेट्रोलको मूल्य २० लाख ८० हजार रुपैयाँ पर्छ ।

त्यति नै परिणामको डिजेलको मूल्य १६ लाख २० हजार रुपैयाँ पर्छ । त्यसरी आएको तेल निगमका उच्च अधिकारीले आफ्नो आसेपासे, नातागोता, पेट्रोलपम्प र मोटो रकम बुझाउने व्यवसायीलाई परलभन्दा धेरै महंगोमा बिक्री गरिरहेका छन् । व्यवसायीका अनुसार प्रतिट्याकंर पेट्रोल ३५ लाख रुपैयाँ र डिजेल २६ लाख रुपैयाँसम्ममा बिक्री भइरहेको छ ।