गुगलका ६ कमजोरीलाई गुगलका पूर्व कर्मचारीले खुलासा गरेपछि

गुगल कम्पनीमा जागिर पाउनु भनेको हामीजस्ता कोहीपनि व्यक्तिका लागि जिवनको सबैभन्दा ठूलो उपलब्धी हुने कुरामा दुइमत नहोला ।

दुनियाको सबैभन्दा मूल्यवान कम्पनी भएर मात्र होइन यसको ब्राण्ड तथा यसमा पाउने तलब भत्ताका कारण गुगलमा जो कोही मानिस काम गर्न चाहन्छ । गुगलमा काम पाउनु धेरैका लागि केवल सपना तथा कल्पना मात्रै हो । तर हरेक चिजका सबै गुणमात्र हुँदैनन् केही दुर्गुण पनि हुन्छन् ।

बाहिरबाट गुगल कम्पनीमा काम गर्न पाउनुलाई जति भाग्यमानी सम्झिइन्छ, गुगलमा काम गरेर वाक्क भएकाहरुका लागि भने धेरै कुरा बिझाएको हुनसक्छ ।

गुगलमा काम गरिसकेका केही पूर्व कर्मचारीहरुले सोसल साइट कोरामा गुगलका बारेमा केही त्यस्ता गोप्य तथा नकारात्मक कुराहरु खुलासा गरिदिएका छन् । गुगल कम्पनीले आफ्ना  यी नकारात्मक पक्षहरु  कसैले थाहा नपाउन् भनेर सधै लुकाउन चाहन्छ:

१. गुगलले शैक्षिक बेरोजगारीको फाइदा उठाउँदै स साना काममा पनि कामको आवश्यकता भन्दा निकै  बढि शैक्षिक योग्यता भएका कर्मचारीहरु खटाउने गरेको छ ।

अमेरिकाका उत्कृष्ट १० विश्वविद्यालयका उत्कृष्ट विद्यार्थीहरुलाई गुगलले आफ्नो यु ट्युबमा अपलोड गरिएका अनावश्यक सामाग्रीहरु हटाउने कामका लागि राखेको छ, जुन काम निकै साधारण योग्यता भएका मानिसले पनि गर्न सक्छ ।

२. जोएल जोन्सन नामका एक व्यक्तिले गुगलका बारेमा अर्को खुलासा गरेका छन् सोसल साइट कोरामा । उनले गुगलमा जागिर सुरु गरेको ४ महिनामै दिक्क भएर जागिर छाडेका रहेछन् । उनका अनुसार गुगलभित्र पनि अफिस राजनीति चल्दछ । हाकिमको चाकडी गर्ने मानिसको छिटै बढुवा हुन्छ र नयाँ कर्मचारीप्रति पूराना कर्मचारीले राम्रो व्यवहार गर्दैनन् ।

३. एक अर्का गुगल पूर्व कर्मचारकिा अनुसार गुगलमा काम गर्ने इन्जिनियर निकै घमण्डी छन् ।  सबैले आफु सबैभन्दा राम्रो भएको घमण्ड गर्छन् । गुगलमा एक आपसमा वस्तुपरक तथा सार्थक छलफल निकै कम हुन्छ र सबै मानिस केवल आफ्नो कामसँग पनि मतलब राख्दछन् ।

४. गुगल एक ठूलो कम्पनी हो, जहाँ स्वभाविक रुपमा एक जना कर्मचारीको मूल्य अर्थात् गणना निकै कम हुन्छ । गुगलमा आफ्नो काम तथा प्रभाव देखाउन निकै मुस्किल पर्दछ ।

आफुले गरेको राम्रो कामका बारेमा पनि हाकिम वा अरुले थाहा पाउँदैनन् । तपाइँ गुगलमा काम गर्ने नामूद इन्जिनियर हुनुहुन्छ र ठूलै नयाँ कुरा आविष्कार गर्नुभयो भने पनि गुगलमा त्यसको अर्थ नहुन सक्छ र तपाइँको यो नयाँ आविष्कारको सुनुवाई नै नहुन सक्छ ।

एक जना गुगलका पूर्व कर्मचारीले आफ्नो भ्यालू नै नभएको भन्दै गुगलमा ३ वर्ष काम गरेर आफुले जागिर छाडेको खुलासा गरेका छन् ।

५. गुगलमा मध्यक्रमको व्यवस्थापनको निकै ठूलो समस्या छ । वरिष्ठहरु आफु मातहत काम गर्ने कर्मचारीहरुलाई प्रोत्साहित गर्दैनन् । गुगलका लागि आफ्नो नाम तथा प्रतिष्ठाले सबैभन्दा ठूलो मूल्य राख्दछ । त्यसैले कतिपय प्रयोगहरु असफल हुने डरले धेरै दबाउने गरिन्छ ।

६. गुगलले प्रडक्ट इन्जिनियरमा निकै ध्यान दिन्छ तर जब प्रडक्ट डिजाइनिंगको कुरा आउँछ त्यस मामिलामा गुगल निकै पछि छ । त्यसैले वेभ, गुगल भिडियो, बज, डड्जबल, अर्कट, नल तथा फ्रेण्ड कनेक्ट जस्ता प्रडक्हरु असफल रहे ।