काठमाडौं । एभरेष्ट बैंकले दुई आर्थिक बर्षमा तीन अर्ब ५३ करोड रुपैयाँ अर्थात १७६ प्रतिशत वोनस सेयर दिने गरी पुँजी योजना पेश गरेपछि सेयर बजारमा उछाल आएको छ । बैंकको सेयर एकै दिन प्रति कित्ता २१० रुपैयाँ बढेको छ । अघिल्लो दिन ३१८० रुपैयाँमा बन्द भएको एभरेष्टको सेयर बुधबार ३२९० रुपैयाँ प्रति कित्ता पुगेको छ । मूल्य बृद्धिसँगै बैंकको सेयर सबैभन्दा वढी कारोबार भएको छ । एभरेष्टको आठ करोड १६ लाख रुपैयाँको सेयर किनबेच भएको हो । सानिमा बैंकको पनि सात करोड २९ लाखको सेयर कारोबार भएको छ । एभरेष्ट, सानिमासँगै ग्लोबल आइएमइ, एनआइसी एसिया, बैंक अफ काठमाण्डूलगायतको सेयर कारोबारमा तिब्रता आएपछि बजारमा बुधबार ५९ करोड २४ लाख रुपैयाँको सेयर किनबेच भएको छ । बजार १२ अंक उक्लिँदै ११८१ अंक पुगेको छ । दिनभरीमा १२७ कम्पनीका नौं लाख २७ हजार १४९ कित्ता सेयर कारोबार भएका छन् । बुधबार बिमा २८, होटल २६, बैंक १५, जलविद्युत १३, अन्य साढे दुई, विकास बैंक १० अंकले बढेको छ । हाथवे समूहले खरीद गरिरहेको अरुण फाइनान्सको सेयर करिव १०प्रतिशतले बढेर प्रति कित्ता ११५ रुपैयाँ पुगेको छ । युनियन फाइनान्सको सेयर मूल्य पनि १० प्रतिशतको हाराहारीमा बढेकोे छ । कमाउनेमा काष्ठमण्डप डेभलपमेन्ट, नेको इन्स्योरेन्स, एभरेष्ट बैंकका लगानीकर्ता छन् । गुमाउनेमा यति विकास, कैलास विकास, रिडी हाइड्रो, कालिका माइक्रो क्रेडिटका लगानीकर्ता छन् ।